АКАДЕМИКТІ АСҚАРАЛЫ ЖАСЫМЕН ҚҰТТЫҚТАДЫ
25.5.2022
981
2022 жылғы 25 мамыр күні Тіл саясаты Комитетінің төрағасы Әділбек Қаба мен Шайсұлтан Шаяхметов атындағы «Тіл-Қазына» ұлттық ғылыми-практикалық орталығының басшысы Ербол Тілешов ҚР ҰҒА академигі, филология ғылымдарының докторы, профессор, Қазақ жаратылыстану ғылымы Ұлттық Академиясының вице-президенті, «Парасат», «Құрмет» ордендерінің кавалері, Қазақстан Республикасының Білім беру ісінің құрметті қызметкері Кәрімбек Құрманәлиевті қабылдап, асқаралы 60 жасына орай Қазақстан Республикасы Білім және ғылым министрінің Құттықтауын табыс етті.
Кәрімбек Арыстанбекұлы мемлекеттік тілдің мәртебесін асқақтату жолында еңбек етумен бірге, еліміздегі білім, ғылым саласына айрықша үлес қосып келеді. Қоғамдық жұмыстарға белсене араласып, өзіне тән батыл пікірімен елімізге танымал болды.
Қазақстанның әлеуметтік-экономикалық және мәдени дамуына қосқан үлесі зор.
Министрдің Құттықтау хатында былай делінген:
«Сіздің саналы өміріңіз ардақты мамандық ұстаздық пен ақыл-ойдың қазынасы – ғылымға арналып, қатардағы оқытушыдан академикке дейінгі белестерді бағындырдыңыз.
Еліміздің жетекші оқу орындарында ұрпаққа тәрие мен білім дарытып, көптің үлкен құрметіне бөлендіңіз. Білім және ғылым министрлігінде департамент басшысы ретінде кәсіби білікті мамандарды дайындауға зор үлес қостыңыз.
Қарымды ғалым ретінде атқарған жұмыстарыңыз ғылыми жұртшылыққа жақсы таныс. Сіздің ғылыми және әдістемелік еңбектеріңіз білім алушылар мен мамандардың қажетіне жарауда».
