Қонаев қаласындағы бұл келелі бас қосуда Қазақстан Республикасы Президентінің «Әділетті Қазақстан: бәріміз және әрқайсымыз үшін. Қазір және әрдайым» сайлауалды бағдарламасын іске асыру жөніндегі іс-қимыл жоспарын жүзеге асыра отырып, тілдік негізде кемсітушіліктің кез келген түріне табанды қарсы тұруды, оның алдын алу және болдырмауды, сондай-ақ мемлекеттік тілдің одан әрі дамуы мен практикалық қолданылуын ынталандыруды жүзеге асыру мәселелері сөз болды.

Іс-шараға ҚР Ғылым және жоғары білім, Ақпарат және қоғамдық даму министрліктерінің, Жоғарғы сот, Бас прокуратура, Ш.Шаяхметов атындағы «Тіл-Қазына» ұлттық ғылыми-практикалық орталығының өкілдері, облыстардың, Астана, Алматы, Шымкент қалалары әкімдіктерінің тілдерді дамыту мәселесіне жауапты басшылары, Алматы облыстық тілдерді оқыту орталықтарының директорлары мен оқытушылары, полиция департаменті, ішкі саясат, қоғамдық даму, білім, мәдениет басқармаларының басшылары, жалпы өңірдің тіл жанашырлары қатысты.

Форумға қатысушылар «Қазақстан Республикасындағы тіл саясатын дамытудың 2023-2028 жылдарға арналған Тұжырымдаманың» жобасымен танысып, талқылады.