АЙМАҚТЫҚ КОНФЕРЕНЦИЯҒА ҚАТЫСТЫ
2023 жылғы 23 ақпан күні Ш.Шаяхметов атындағы «Тіл-Қазына» ұлттық ғылыми-практикалық орталығының жетекші ғылыми қызметкері, филология ғылымдарының кандидаты, доцент Гүлназ Төкенқызы Қарағанды қаласы химия-биология бағытындағы Назарбаев Зияткерлік мектебінде өткен «Ахмет Байтұрсынұлының ұлағатты ісі – ұлтқа тағылым» атты аймақтық конференция жұмысына онлайн режімде қатысып, баяндама жасады.
Келелі бас қосуда ұлт ұстазының оқу-ағарту саласындағы, сондай-ақ қоғам қайраткері ретіндегі сіңірген еңбектері мен оның шығармашылығын оқытудағы инновациялық әдіс-тәсілдер туралы, жалпы Ахаңның ақындық және аудармашылық мұралары жөнінде кеңінен сөз болды.
«Ахмет Байтұрсынұлы – қазақ тіл білімі, әдебиеттану сияқты жеке ғылым салаларының ғылыми терминологиясының негізін қалаған ғалым, қоғамдық парызын атқаруда жанкештілік танытқан қайталанбас бірегей тұлға. Оны оқып-білу – бүгінгі жастарымыз үшін үлкен тағылым»,– дейді ғалым.
