Ана тіліміздің қадір-қасиеті мен ұлттық рух төңірегінде ой білдірген толғауы тоқсан бас қосу Л.Гумилев атындағы ЕҰУ жанындағы «Кәусар» рухани бірлестігінің ұйымдастыруымен өтті. Көзі қарақты оқырман қауымға жақсы таныс бұл клубты он жылдан астам уақыт бойы Мемлекеттік сыйлықтың лауреаты, профессор Кенжеғали Мыржықпаев үзіліссіз жүргізіп келеді.

«Данышпан Мұқтар Әуезов қазақ әдебиеті ғылымында жүрген бір інісіне: «Жылдар жүрсе арымас жегіндісі – еңбек торысы»,– деп баға берген екен. Сол айтқандайын, кәусар бұлақтай жыр әлемінен сусындау күндіз-түні тіл майданында жүрген жандардың жігерін қайрақтай жанып, жаңа ізденістерге құлшындырады. Ақын өлеңдері айрықша қуат беріп, қазақ тілінің соншалықты құдіретіне арқаланып, кәдімгідей шабыттанып қалдық»,– дейді кеш әсерінен қапелімде арыла алмай тұрған әріптестеріміз.