Дөңгелек үстелді басқарған Дәулеткерей Кәпұлы "Мәңгілік Ел" патриоттық актісі бойынша әңгіме қозғап, шетелден келген қазақтарды және қонақтарды пікір алмасуға шақырды. Аталған жиынның өтуіне мұрындық болып отырған Мәдениет және спорт министрлігі Тілдерді дамыту және қоғамдық-саяси жұмыс комитеті Тіл саясатын талдау және мониторинг басқармасының басшысы Толқын Жолдыбайқызына алғысөз берілді. Толқын ханым тақырыпты толықтай ашып, Мәңгілік Ел болу жолындағы әрбір игі бастамаға қолдау көрсетіп, барша қауымды атсалысуға шақырды:

- Шетелде жүрген қандас бауырларымыз әлемнің қай бұрышында жүрсе де, қай елде қызмет етсе де, өзінің ана тілін, мәдениетін, туған топырағын ұмытпауы тиіс. Ата-бабамыз аманат етіп кеткен киелі жеріміздің, еліміздің өсіп-өркендеуіне Елбасымыздың таңдаулы осы идеясы сүбелі үлес қосатыны сөзсіз. Бүгінгі жалынды жастарымыз - жарқын болашағымыздың кепілі деп білемін. Сондықтан да бұл күнде жасаған әрбір қадамдарыңыз нық, сенімді болуы шарт. Себебі Сіздер Мәңгілік елдің дарынды, талантты ұрпағысыздар. Еліміздің ертеңгі үмітісіздер. Ұлт жоспарының орындалуына, 100 нақты қадамның жүзеге асуына баршамыз бірауыздан атсалысайық.