Шараның басы-қасында болып қайтқан әріптесіміз былай деп ой бөлісті: «Академик Әбдуали Қайдар ағамыз тілдің қоғамдағы өзара байланысы жөнінде айта келіп, оның басты қызметі – коммуникативтік, яғни қоғам мүшелерінің өзара қарым-қатынас жасап, бір-бірін түсінуі, пікір алысуы үшін қажетті қызметі болса, екінші қызметі – көркем шығарма тіліне тән, адам баласына образ арқылы ерекше әсер ететін, ләззат сыйлайтын эстетикалық қызметі деп атап көрсетеді. Осы орайда, бұл көрмені тілдің салтанаты деуге болады. Саф ойға малынған сөз мәйегі сөрелерден менмұндалап қол бұлғайды. Сондықтан, қазақ қоғамының қолына қалам ұстаған беткеұстар майталмандарының бәрі осы жерде. Олармен оқырманға ұғынықты форматта түрлі кездесу жоспарланған. Қолтаңба аласың, естелік суретке түсесің. Бұл жерде айта кеткен орынды шығар деп ойлаймын, бажайлап қараған адамға, қазақ оқырманының ана тіліміздегі кітапқа жұмсаған әр тиыны – мемлекеттік тілімізге салынған инвестиция. Бұдан басқа әлемдік әдебиет жауһарларымен танысуға мүмкіндік мол. Жәрмеңке болғасын, жылдар бойы іздеп жүрген жоғыңмен аяқасты қауыша кетуің ғажап емес. Көздің жауын алған жақсы кітап атаулы жағалай самсап тұр».

Ұйымдастырушылардың айтуына қарағанда, әлемде жыл сайын екі миллионнан астам кітап жарық көреді екен. Бақса, соның басым көбі ағылшын тілінде болып шықты. Ал, отандық кітап саудасы онша көңіл көншітпейді. Әуелі қазақ қаламгерлерінің әлемдік кітап нарығына қарай бейімделгені жөн. Әсіресе, аудармашылар аздығы, олармен жұмыстың дұрыс жолға қойылмауы бізді әлемге орыс тілінің терезесінен қарауға еріксіз мәжбүрлейді. Осы мақсатта атқарылар жұмысқа сенім артып, көрме жұмысына сәттілік тілейміз.

Шара үш күн бойы жалғасады.