Ақтөбе, Батыс Қазақстан облыстарында және Алматы, Астана қалаларында "Қазақстанның болашағы - қазақ тілінде" тақырыбымен мемлекеттік тілді насихаттау шаралары өтті.

Жобаның мақсаты мемлекеттік тілдің қолданыс аясын біркелкілікке жеткізу үшін өңірлік алшақтықтарды еңсеруге басымдық беру. Соның негізінде орыстілді азаматтар арасында мемлекеттік тілді насихаттайтын «Қазақстанның болашағы -- қазақ тілінде» кешенді шаралары ұйымдастырылды.

Жоба аясында аталған облыстарда үстіміздегі жылдың 15 тамызынан 13 қыркүйекке дейін кездесу, дөңгелек үстел, брифинг түрінде барлығы 34 шара өткізілді. Жобаның жұмыс тобы құрамында белгілі саясаткерлер және қоғам қайраткерлері, жергілікті жерлердегі Тілдерді дамыту және Ішкі саясат басқармаларының басшылары қатысты. Жобаның барлық шараларына белгілі қоғам қайраткері Дос Көшім жетекшілік етті.

Шаралар Ақтөбе облысының Алға, Мәртөк Хромтау, Мұғалжар Қарғалы аудандары және Ақтөбе қаласында, Батыс Қазақстан облысының Бөрлі, Теректі, Зеленов аудандары және Орал қаласында, Алматы, Астана қалаларында өткізілді.

Аталған шараларға шамамен 1 700-ден астам адам қатысты.

Қорытынды брифингке жоба жетекшісі, қоғам қайраткері Дос Көшім, саясаткер Расул Жұмалы, қоғам қайраткері Оразгүл Асанғазы және т.б. қатысып, «Қазақстанның болашағы – қазақ тілінде» жобасы аясында өткізілген шараларды қорытындылады.