«ҒАСЫР АДАМЫМЕН» КЕЗДЕСУ
2023 жылғы 11 тамыз күні Қазақстан Республикасы Ғылым және жоғары білім министрлігі Тіл саясаты комитетінің төрағасы Е. Тілешов Халықаралық биографиялық орталықтың (Кембридж, Ұлыбритания) шешімімен «Ғасыр адамы» атанған әлемге танымал ғалым, физика-математика ғылымдарының докторы, Қазақ жаратылыстану ғылымдары академиясының академигі, Е.А. Бөкетов атындағы Қарағанды университетінің профессоры Темірғали Көкетаймен кездесті.
Оксфордта дәріс оқыған алғашқы қазақ Т.Көкетайұлы – ана тіліміздің үлкен қайраткері. Халықаралық «Қазақ тілі» қоғамы Қарағанды облыстық филиалын басқарып, тіліміздің дамуына қомақты үлес қосты. Қарағанды облыстық «Қазақ тілі және мәдениеті» қоғамдық бірлестігін құрды. Ғалым физика саласындағы ғылыми еңбектерімен қатар, физика терминдерінің сөздігін құрастырды. Тіл саласына сіңірген еңбегі үшін «Тіл майталманы» сыйлығының иегері атанып, «Тіл жанашыры» құрмет белгісімен марапатталды.
Кездесу барысында қазақ тілінің қазіргі жай-күйі, қазақ тілінін ғылым тілі ретінде дамыту мәселелері сөз етілді. Әсіресе жаратылыстану саласы терминдері сапасы мәселесіне баса назар аударылды.
Комитет төрағасы, өз кезегінде, қараша айында кәсіби мамандардың қатысуымен жаратылыстану саласы терминологиясына арналған іс-шара өтетінін айтып, кездесу қонағын қатысуға шақырды.
