«Жалпы тіл үйрету мәселесінде тиімді тәсіл таңдай білу аса маңызды. Тіл үйренуге тілек білдірген адамның өз мақсатын игеруіне нәтижелі амалдың жақсы әсер етеді. Сондықтан тіл үйретуде, ең бастысы, тиімді тәсіл таңдай білу қажет. Жоғарыдан бекітілген нұсқадан бір мысқал ауытқуға болмайды деген қасаң көзқарас қазір мүлдем ескірді. Аудитория көлемі ұлғайып, ақпараттық технологиялар жедел дамып жатыр. Гаджет өмірімізге дендеп енді. Мұндай даму көшінен кейін қалуға болмайды», – дейді Жазира Мақсұтқызы.

Өзінің мәнді әңгімесінің «Термин және қауесет» бөлімінде әріптесіміз республикалық терминологиялық комиссия не үшін қажет екенін ақпараттық технология кеңістігінде көп кездесетін балама сөздерді қолдану арқылы түсіндіріп бақты. Ана тіліміздегі ІТ жобалар көмегіне жүгінген өзара сұқбат өте сәтті шығып, тыңдаушылар назарын бірден баурап алды.