АҚТӨБЕДЕ РЕСПУБЛИКАЛЫҚ СЕМИНАР ӨТТІ
Ақтөбе облыстық тілдерді дамыту басқармасы Тілдерді оқыту орталығы ҚР тіл саясатын дамытудың 2023-2029 жылдарға арналған тұжырымдамасын жүзеге асыру, мемлекеттік тілді оқыту үдерісін ілгерілету, озық тәжірибені зерделеу, оқытудың инновациялық әдістері мен технологияларын тәжірибеге енгізу, оқытушылардың кәсіби біліктілігін жетілдіре отырып, өзара тәжірибе алмасу мақсатында «Мемлекеттік тілді үйрету: әдіс, тәжірибе, инновация» атты республикалық әдістемелік онлайн семинар өткізді.
Еліміз көлеміндегі басқосуда А.Байтұрсынұлы атындағы Қостанай өңірлік университетінің қосымша білім беру бөлімінің бастығы Талапова Гүлнәр Маратқызы «Қазақ тілін үйренудің 10 тәсілі» туралы сөз қозғаса, Шығыс Қазақстан облысының тілдерді оқыту орталығының оқытушысы Мұканбаева Жұлдыз Бақытбекқызы «Мемлекеттік тілді оқытуда қолданылатын әдіс-тәсілдер» жөнінде әңгімеледі.
Бұдан басқа Атырау облысы Мәдениет, тілдерді дамыту және архив ісі басқармасының «Тіл» оқу-әдістемелік орталығы Инновациялық және әдістемелік жұмыс бөлімінің әдіскері Есімова Әйгерім Есетқызы «Мемлекеттік тілді оқыту тәжірибесі: жобалық жұмыстар» хақында ой бөлісіп, Ақтөбе облысының тілдерді дамыту басқармасының Тілдерді оқыту орталығының оқытушысы Омарова Жанар Әділқызы «Тіл үйретудегі айтылым дағдысын дамытуға арналған әдіс-тәсілдер» төңірегіндегі өз тәжірибесімен бөлісті.
Семинар соңында алғыс хат пен сертификаттар табысталды.
